Азарганы синдикат

Синдикат гэдэг нь тодорхой бизнесийн зорилгоор, эсвэл нийтлэг ашиг сонирхлоор хамтарч үйл ажиллагаа явуулдаг хувь хүмүүс, компани, групп, аж ахуйн нэгжүүдийн бүлэг буюу нэгдэл гэдгийг хэн бүхэн мэдэх байх. Ихэнх тохиолдолд синдикат нь бүлгийн ашиг сонирхлоо хамгаалж, хууль ёсны бизнесийн ашиг орлогоо нэмэгдүүлэх зорилготой байдаг юм. Гэхдээ гэмт хэргийн бүлэглэлүүдийг ч синдикат гэж нэрлэж ойлгох тохиолдол бас байдаг билээ.
Түүнчлэн хурдан морины уралдаан, адууны бизнес өндөр хөгжсөн орнуудад адууны синдикат гэсэн ойлголт байдаг ажээ. Энэ нь тухайн адууг хэд хэдэн хүн, эсвэл компани хамтарч эзэмших гэсэн ерөнхий ойлголт юм. Өөрөөр хэлбэл адууны синдикат нь манайхны ойлголтоор хувьцаат компанийн шинжтэй буюу хувьцааны тоогоор эзэмших олон эзэнтэй байна гэсэн үг юм. Ингэснээр адууны синдикатын субектүүд тухайн адуунаас олох үр ашгийг хамтарч хүртэх давуу талтай байдаг байна. Тодруулж хэлбэл азарганы синдикат эзэд нь хувьцаандаа ноогдох хэмжээгээр гүү гишгүүлж, үр төл авахаас гадна нийтэд зарласан үржүүлгийн хураамжнаас ашиг хүртэх боломжтой юм. Мөн үнэтэй адуунд их хэмжээний хөрөнгө оруулалт хийхэд гарах эрсдэлээ хувааж байгаагаараа ихээхэн давуу талыг олгодог байна.
Синдикат буюу олон субект эзэн нь байхыг хүсч байгаа адуу бол мэдээж маш үнэ цэнтэй адуу байх нь ойлгомжтой. Ихэвчлэн маш сайн үр төл өгч байгаа азарга нь синдикат болох нь нийтлэг байдаг байна. Тухайлбал алдарт Мистер Проспектор азарга нь адууны синдикатын том жишээ юм.
Мистер Проспектор нь үр удам нь хэдэн үеэрээ жигд хурдалж байгаа цэвэр цусны шилдэг азарга билээ. Ялангуяа түүний үр, төлүүд нь алдарт Гурван титмийн уралдаануудад тогтмол түрүүлдэг тул Мистер Проспекторыг Гурван титмийн доминант азарга гэж мэргэжилтнүүд үнэлдэг байна. Тэрээр өөрийн шууд төлүүдийн амжилтаараа Америкийн шилдэг азарга цолыг 11 удаа хүртжээ. (Ledaing sire and Leading broodmare sire).
1975 оноос үржүүлгэнд орж, олон сайн төл өгч эхэлсэн Мистер Проспекторын эзэмшигч Эйско зүчээ 1980 онд түүнийг 20 сая доллараар үнэлэн нэг бүр нь 500,000 долларын үнэтэй 20 ширхэг хувьцаа гарган амжилттай худалджээ. Ингэснээр Мистер Проспекторын  хувьцааг эзэмшигчид алдартай азарганд өөрсдийн гүүгээ хураалгаж төл авах боломжтой болсон байна. Мөн нийтэд зарласан үржүүлгийн хураамж 100,000-325,000 долларт хүрч байсан тул хувьцаа эзэмшигчид их хэмжээний ашиг орлого хүртэж байсан юм. Форбс сэтгүүлээс Мистер Проспекторыг цэвэр цусны адууны түүхэн дэх хамгийн их орлого олсон 10 азарганы жагсаалтад оруулжээ.
Түүний үр удмаас Зенятта, Курлин, Лүүкин эт Лаки, Рүлер он Айс тэргүүтэй 29 адуу Бридерс Кап, Кентаки Дерби, Прикнес Стейкс, Белмонт Стейкс уралдаануудад 40 удаа түрүүлээд байна. Энэ баримт түүний төлүүд Гурван титмийн уралдаанууд үнэхээр давамгайлж уралддагийг харуулж байгаа билээ. Мөн Мельбурн Кап, Дубайн дэлхийн цом, Японы цом, Английн Гурван титмийн зэрэг дэлхийн бусад топ уралдаануудад ч түүний төлүүд олон түрүүлсэн байна. Мистер Проспекторын 165 төл нь ямар нэг уралдаанд түрүүлж байсан нь дээд амжилтанд тооцогддог юм.
Мистер Проспекторын төл нэгэн даагыг Японы бизнесмен Фусао Секигүчи (Fusao Sekiguchi) 4 сая доллараар худалдан авч, Фусайчи Пегасус (Fusaichi Pegasus) хэмээн нэрлэж, хязааланд нь Кентаки Дерби-д түрүүлгэн тэр жилдээ Ирландын Күүлмоор зүчээнд 60 сая доллараар зарж байв.
Мистер Проспектор азарганы хувьцаа эзэмшигчид олон хурдан адуутай болж, уяж сойн уралдуулж түрүүлгэн нэр алдарт хүрч байснаас гадна, худалдан борлуулж ихээхэн ашиг орлого олж байсныг дээрх баримтууд харуулж байна.
Мистер Проспекторын төлийн төл  Вест Монголиа (West Mongolia) азарганы үржүүлгийн эрх Максын дуудлага худалдаанд орох гэж байгаа нь манай хурдн морины хөгжилд чухал алхам болно гэж үзэж байна.
Адууны синдикат нь дараах давуу талуудтай:
1. Адууны эзэн хувьцаа гарган худалдсанаар өөр хөрөнгө оруулалт хийх боломжтой болно.
2. Адууны эзэн өндөр үнэтэй адуугаа бусадтай хамтран эзэмшсэнээр эрсдэлээ бууруулна.
3. Нэг адууны үр төлүүд олон хүнд очсоноор амжилт гаргах магадлал ихсэнэ. Учир нь 1 уяач 1 адууны 10 төлийг уяаснаас 10 уяач 10 тусдаа уявал илүү олон нь амжилт гаргах магадлал өндөр.
4. Хувьцаа худалдан авснаар өндөр үнээр адуу худалдан авахад гарах эрсдэлийг бууруулна.
5. Дангаараа өндөр үнээр адуу худалдан авах боломжгүй хүмүүст хурдан адууны хувьцаа эзэмшигч болж үр төл авах, бусад ашиг орлого олох боломж нээгдэнэ.