П.Гэрэлбаатар: Хатагин адуу гэсэн бэсрэг угшил бий болгож нутгийнхаа нэрийг дуурсгахыг үгүйсгэхгүй

Дорнод аймгийн Матад  сумын уугуул, “Хан шувалдай” барилга, угсралтын компанийн захирал Пүрэвгэрэлийн Гэрэлбаатар сумынхаа морин спорт уяачдын холбооны тэргүүнээр сонгогдоод буй юм. Бид шинэхэн тэргүүнтэй цөөн хором хөөрөлдөж, цаашдын зорилгынх нь  талаар тодруулсан юм.
-Матад сумын МСУХ шинэ тэргүүн болж. Нутгийн олны талархлыг хүлээж тэргүүнээр сонгогдсон танд баяр хүргэе.
-Баярлалаа. Манай аав Матад сумын хүн. Эцэг өвгөдийн төрж өссөн уугуул нутгийнхаа хөгжилд өөрийн хувь нэмрээ оруулахаар энэ жил Дорнод  аймаг дахь Матад сумын нутгийн зөвлөлийн даргаар сонгогдсон. Харин энэ сарын 18-нд Матад сумынхаа уяачид хурдан морины зүтгэлтнүүдийн хүсэлтээр сумын  МСУХ-ны тэргүүнээр сонгогдлоо. Ээлжит бага хурлаар хоёр хүн тэргүүлэгчид нэр дэвшиж, миний бие үнэмлэхүй ялалт байгуулан тэргүүнээр сонгогдсон.
-Албаа хүлээж аваад л зохион байгуулалтын ажилд орсон юмаа даа.
-Тэгсээн. Маргааш нь сумынхаа хаврын уралдааныг зохион байгуулж, их нас, хязаалан, соёолон насны морьд уралдсан. Уг нь энэхүү уралдаан уламжлал болоод байсан ч сүүлийн 2-3 жил тасраад байсан юм. Энэ жилээс эхлээд цаашид жил бүр уламжлал болгон зохион байгуулж байх болно.
-Уралдаан хэр өтгөн болов?
-Малын гоц халдварт шүлхий өвчинтэй холбоотойгоор хаврын уралдаанууд хойшилж уяачид маань хүлээлтийн байдалтай байсан. Тиймдээ ч саяын уралдаан нэлээд өргөн дэлгэр болж, Сүхбаатар аймгийн Эрдэнэцагаан, Сүхбаатар, Дорнод аймгийн Матад, Хэрлэн, Халхгол болон аймгийн төвөөс уяачид хурдан хүлгийнхээ хамт ирж оролцлоо. Байгаль дэлхий ч гэсэн бороо хураа харамгүй хайрлан шороо тоосгүй сайхан наадам болсон.
-Зохион байгуулалтын тал дээр нэлээд анхаарсан сурагтай байсан?
-Тэгсээн. ММСУХ-ноос мөрдөж буй журмын дагуу, орон нутгийнхаа удирдлагуудаас албан ёсны зөвшөөрөл авч, хүн эмнэлэг, мал эмнэлэг, хүүхдийн байгууллагын төлөөлөл гээд зургаан хүний бүрэлдэхүүнтэй комисс байгуулсан. Мөн аймгийн цагдаагийн газрын ажилтнууд харуул  хамгаалалтын тал дээр ажилласан.
-Зохион байгуулалт сайтай уралдааны үед хүүхэд унаж бэртэх тохиолдол гардаггүй?
-Тэгэлгүй яахав. Нэг ч хүүхэд унаж бэртээгүй. Цаашид ч гэсэн бид аливаа уралдааныг хийхдээ албан ёсны зөвшөөрөл авахаас эхлээд зохион байгуулалтын тал дээр нь илүүтэй анхаарч хэвшихээр шийдээд байгаа. Энэ удаагийн уралдааны бас нэг онцлог нь мориныхоо давхилыг харах гэсэн уяачдаа нэгдсэн журмаар микро автобусанд суулгаж дагуулсан. Ингэхээр дагах машины тоо цөөрч, ер нь их зөв шийдэл болсон.
-Матад сумын адуу улс, бүсийн дэвжээнд уралдан аймгийнхаа нэрийг дуурсгадаг. Шинэхэн тэргүүн нутгийн адуу хөгжүүлэх тал дээр ямар төлөвлөгөөтэй байгаа вэ?
-Сумынхаа морин спорт уяачдын холбооны үйл ажиллагааг идэвхжүүлж, нутгийн хурдан адуу, уяачдынхаа талаар сурталчлан таниулах ажлыг түлхүү хийнэ гэсэн бодолтой байгаа. Мөн нутгийн адуугаа сайжруулж, цаашлаад угшил бий болгох тал дээр анхаарч ажиллана. Галшар адуу гэдэг шиг яваандаа Хатагин адуу гэсэн бэсрэг угшил Матад сумын нэрийг дуурсгахыг үгүйсгэхгүй. Өөр нэгэн санаж зорьж яваа ажил бол уяачдынхаа хоорондын уялдаа холбоог сайжруулж, илүү олон “Цэндбаатар” төрүүлэх зорилготой байна. Түүнчлэн хурдан морь унаач хүүхдийнхээ аюулгүй байдлыг хангах тал дээр анхаарч, төв холбооноос гарч байгаа бодлого шийдвэрийг дагах болно.
-2014 онд Матад сумын 90 жилийн ой тохиож байгаа. Нутгийн дэвжээгээ хамгаалж үлдэхээс эхлээд холбооны тэргүүнд үүрэг хариуцлага багагүй нэмэгдэж байгаа биз?
-Сумынхаа  90 жилийн ойн баяр наадмын хурдан морины комиссын даргаар сонгогдсон. Тэр хүрээндээ ойн баяр наадмын зургаан насны түрүү морьдоо авто машинаар байлахаар зэхэж байна. Үүнээс гадна үзэгчдээ тав тухтай байлгах үүднээс барианы газрыг засч янзлах зэрэг хийх ажлууд нэлээд бий.
-Морь сонирхдоггүй, адуунд элэггүй хүмүүс энэ сонгуульт албыг хашдаггүй. Гэрэлбаатар тэргүүний хурдан морьтой холбогдсон түүхийг сонирхож болох уу?
-Сумын ойг  тохиолдуулаад ах дүүс маань хэд хэдэн адуу бэлэглэсэн. Түүнийгээ уях бодолтой байгаа. Барилгын салбарт нэлээд хэдэн жил ажилласан. Бизнес маань нэг үеэ бодвол хөл дээрээ зогссон учраас одооноос өөрийнхөө дуртай зүйлд цаг зав гаргая гэж шийдсэн.
-Хурдан морь өөрт нь сэтгэл зүрхээ зориулсан нэгнийг заавал баярлуулдаг гэдэг. Тийм баярт мөчид дахин уулзъя. Ярилцсанд баярлалаа.

А.Мөнх