Түмэн эх төгөлдөр хул

Улаанбаатар хотын Хан-Уул дүүргийн харьяат, “Босоо хүлэг” галын гишүүн Аюурын Амарбатын хул морь наадамчин олны тааврыг эвдэж төрийн түмэн эхээр тодорлоо. Өнгөрсөн жил Сүхбаатар аймгийн баяр наадамд аман хүзүүдсэнээс хойш уяачид, морины зүтгэлтнүүдийн хараанд өртсөн хул морь энэ хавар одоогийн эзэндээ иржээ. Сүхбаатар аймгийн аварга хүлэг шалгаруулах “Жавхлант шаргын хурд-2014” уралдааны үеэр Тод манлай уяач Б.Бат-Өлзий буюу Дугараа, Манлай уяач Д.Хишигжаргал нар  хул моринд үнэ хэлж, Манлайнх болсон байна.
Угшил гарвал: Хул морь Сүхбаатар аймгийн Дарьганга сумын уугуул, аймгийн Алдарт уяач Г.Гонгоржавын унаган адуу. Г.Гонгоржав уяач Сүхбаатар аймгийн Халзан сумын харьяат Түмэнжаргал найзаасаа соёолон хүрэн үрээ авч, сумынхаа баяр наадамд дөрөв айрагдуулсан нь хул морины эцэг Өвгөн хүрэн азарга юм. Хүрэн азарга өдгөө 22 настай хүлэг ижил сүрэгтээ үүрсэн буйн дээр Алдартынд хурдны үр тарьсан буянт мал билээ. АХ-ын 91 жилийн ой төрийнхөө их баяр наадамд аман хүзүүдэж, Сүхбаатар аймгийн 70 жилийн ой зүүн бүсийн уралдаанд түрүүлсэн Г.Нямцэрэнгийн хар шүдлэн болон зүүн бүсэд түрүүлсэн Бат-Эрдэнийн хар алаг соёлолон, аман хүзүүдсэн П.Баянхүүгийн хүрэн халзан соёолон нь Г.Гонгоржав Алдартын Өвгөн хүрэн азарганы үр сад билээ. Хул морь эцэг талаас ийм  түүхтэй бол эх ухаагч гүү нь Нийгмийн Тожингийн угшилтай Алдартын унаган адуу гэх юм билээ.
Амжилтын товчоон:
Түмэн эх хул морь  соёолонгоосоо эхэлж уягдан
2009 онд соёолондоо:
Дарьганга сумынхаа баяр наадамд 12
Овооны тахилгат /хоёр ч /13
2010 онд хавчиг морь:
Дарьганга сумынхаа баяр наадамд аман хүзүүд
Баяндалай уулын тахилга наадамд аман хүзүү
2011 онд долоотой морь:
Баяндалай уулын тахилга наадамд аман хүзүү
2012 онд наймтай морь:
Баяндалай уулын тахилга наадамд түрүү
Түвшинширээ сумын 80 жилийн ойд айргийн тав
2013 онд естэй морь:
Сүхбаатар аймгийн баяр наадамд аман хүзүү
Хэнтий аймгийн 90 жилийн ой зүүн бүсийн уралдаанд 11
2014 онд аравтай морь:
Сүхбаатар аймгийн аварга хүлэг шалгаруулах “Жавхлант шаргын хурд-2014” уралдаанд 20 гаргаж
АХ-ын 93 жилийн ой төрийн их баяр наадамд түрүү

А.Тэлмэн