Дэлтэй Цэнхэр МСУХ-ны “Ирээдүйн Түмэн Эх”-үүд тодорлоо

Хөвсгөл аймгийн Дэлтэй Цэнхэр МСУХ энэ жилийн отгон уралдаан болох "Ирээдүйн Түмэн Эх" хурдан дааганы уралдааныг 2015 оны 09-р сарын 19-нд Алаг-Эрдэнэ сумын Эрхэлийн Унага МСУХ-тай хамтран тус сумын нутагт зохион байгууллаа. Жил бүрийн намрын дунд сарын эхээр зохиогддог уламжлалт уралдаанд Алаг-Эрдэнэ, Бүрэнтогтох, Мөрөн, Тариалан, Хатгал, Их-Уул, Улаан-Уул зэрэг зургаан сумын уяачид оролцов.
Уралдааны үйл ажиллагааг Дэлтэй Цэнхэр МСУХ-ны тэргүүн, УИХ-ын гишүүн Ц.Даваасүрэн нээж эхлүүлсэн бол уралдааны үеэр Мөрөн сумын харьяат аймгийн Алдарт уяач Ж.Нямлхагва, Алаг-Эрдэнэ сумын уяач н.Ням-Эрдэнэ, н.Далайбаатар, Г.Болор-Эрдэнэ, Их-Уулын сумын уяач Б.Ганзориг, Тариалан сумын уяач З.Батцогт нарыг ММСУХ-ны “Уяачийн алдар” болон 20 жилийн ойн медалиар шагнаж урамшууллаа.
Хурдан шандаст 40 шахам Ирээдүйн Түмэн Эхүүд уралдааны замд гарснаас:
1. Тариалан сумын уяач н.Батцогтын “Бүжин” хүрэн даага түрүүлэн ирж “Ирээдүйн Түмэн эх”-ээр цоллууллаа. Бүжин хүрэн даага өнөө жилийн “Булганхангайн хурд-2015” хангайн бүсийн наадамд айрагдсан, аймгийн чанартай наадмуудад хоёр айрагдсан.
2. Хөвсгөл аймгийн Бүрэнтогтох сумын уяач  Ч.Батсуурийн сартай хүрэн даага. Төмөрбулаг сум байгуулагдсаны 90 жилийн ой "Идэрийн бүсийн хурд" наадамд айрагдсан, Цагаан-Уул сумын "Гурван буман малын баяр" наадамд түрүүлсэн.
3. Хөвсгөл аймгийн Тариалан сумын уяач н.Эрдэнэцогтын сартай хонгор. Хөвсгөл аймгийн "Шигшмэл хурд" уралдаанд айрагдсан.
4. Хөвсгөл аймгийн Тариалан сумын уяач н.Нямсүрэнгийн “Мөнгөн хөлт”. Өнөө жилийн аймгийнхаа баяр наадам, Төмөрбулаг сумын 90 жилийн ой “Идэрийн бүсийн хурд”, Хөвсгөл аймгийн "Шигшмэл Хурд" наадам зэрэг аймаг болон аймгийн чанартай наадамд 3 түрүүлж 1 айрагдсан, сум орон нутгийн чанартай наадамд олон айраг түрүү авсан амжилттай.
5. Хөвсгөл аймгийн Их-Уул сумын аймгийн Алдарт уяач Б.Ганзоригийн шарга даага.
Уралдаанд түрүүлсэн Тариалан сумын уяач З.Батцогтын хүрэн даагыг Дэлтэй Цэнхэр МСУХ-ны тэргүүн УИХ-ын гишүүн Ц.Даваасүрэн алдарт Тожин ногоон азарганыхаа төл ногоон даагаар байллаа.
Дэлтэй цэнхэр МСУХ-ны ажлын алба Т.Наранхүү