Уралдаанч М.Гүндалай: Унадаг дугуй, сагсан бөмбөг өгвөл баярлана

Баянхонгор аймгийн тусгай дугаарыг бэлтгэх үеэр Баянцагаан сумын уралдаанч М.Гүндалайтай уулзаж ярилцсанаа хүргэж байна.

-Хэдэн жил хурдан морь унаж байгаа билээ?
-Зургаан настай анх морь унаж сураад, долоон настай өөрийнхөө хонгор халзан  морийг унаж сумын наадамд таваар давхиулсан. Мөн багийн наадамд гурав, дөрвөөр давхиулж хоёр айраг авсан. Тэгээд хот руу явж Баяраа ахын бүх морийг унасан. 
-Улсын баяр наадам ямар санагдсан бэ?
-Гоё болдог юм билээ. Хонгор азарга  сунгаанд аман хүзүүдсэн хэр нь яг наадмаар 25-д давхисан. Би уг нь айрагдчих байх гэж бодож байсан юм. Өнгөнд гараад явж байснаа суугаад хойшлочихсон.
 -Тэгвэл Өвөрхангайн бүсийн уралдаан хэр санагдсан бэ?
-Гоё. Гэхдээ хамгийн гоё нь Улаанбаатарт болсон Хүрээ цам даншиг наадам. Тэнд хонгор азарга 30, хээр морь 20 гаргаж давхисан. Улсын наадмаар ногоо гараагүй их тоостой байсан бол даншгаар бороо ороод гоё болчихсон байсан. 
-Уралдаанч хүүхдэд тулгардаг бэрхшээлүүд юу вэ?
-Хамгийн хэцүү нь хөөрүү морь унах. Бусдаар бол гайгүй дээ. 
-Тэгвэл хамгийн сайхан нь юу вэ?
-Унасан морио түрүүлгэж айрагдуулах л хамгийн сайхан. Би Өвөрхангай, Улаанбаатар,Говь-Алтай болон аймгийнхаа Шинэжинст, Баацагаан, Баян-Өндөр зэрэг суманд морь унаж байсан.
-Наадмын урьд шөнө юу бодогддог вэ?
-Маргааш  хурдан болоосой л гэж бодно доо. Тэгж бодохоор догдлоод хоол орохоо больчихдог юм./инээв/ 
-Хүүхдээр морь унуулах эсэх тухай асуудал яригддаг. Хэрвээ тийм шийдвэр гарвал яах вэ?
-Больчихвол хөгшин морио унаад л хөдөө хонь хариулна даа.
-Мориныхоо байнд ямар бэлэг авахыг хүсдэг вэ?
-Өгсөн юмыг нь л авдаг. Гэхдээ унадаг дугуй, сагсан бөмбөг өгвөл гоё. Тэгвэл баярлана. Яагаад гэхээр миний сагсны бөмбөг хагарчихсан.
-Том болоод ямар мэргэжилтэй болохыг хүсдэг вэ?
-Уяач болно гэж боддог.
-Сайн уяач болохын тулд ямар байх ёстой вэ?
-Морио сайн мэдэрч, хоол идэж байгаа эсэхийг сайн харна.
-Яавал морио сайн мэдрэх вэ?
-Морьтойгоо дотно байвал мэддэг болох байх. 
-Хүслээ биелүүлж, сайн уяач болоорой. Амжилт хүсье.
-За.

"Тод магнай" сэтгүүл Баянхонгор аймгийн тусгай дугаар