Уралдаанч Б.Энхмөнх: САЙН УНААЧ САЙН УЯАЧ БОЛДОГ ГЭЖ ААВ ХЭЛСЭН

Баянхонгор аймгийн Өлзийт сумын уралдаанч Б.Энхмөнхийн ярилцлагыг хүргэж байна.

-Баянхонгор аймгийн “Шигшмэл хурд” уралдаанд хязаалан түрүүлгэсэнд баяр хүргэе?
-Баярлалаа. Бууцагаан суманд болсон “Шигшмэл хурд” уралдаанд Оонон бор үрээгээ унаж түрүүлгээд медалиар шагнуулсан. Аавыг том аяга 500,000 төгрөгөөр шагнасан. 
-Шигшмэл хурд чиний оролцож байсан хамгийн том наадам уу?
-Тийм. Гэхдээ аймгийн наадамд бас оролцож байсан. 
-Ингэхэд хэзээнээс хурдан морь унаж байгаа юм бэ?
-Зургаан настай морь унаж сураад долоон настайгаасаа эхлээд хурдан морь уралдсан. Одоо гурав дахь жилдээ уралдааны морь унаж байна. Хамгийн анх би Баянзүрх хайрханы тахилга наадамд Оонон  борыгоо унаж түрүүлгээд ахиад хоёр наадамд зургаад давхисан. Дараа жил нь Өлзийт сумынхаа наадамд гурваар давхиад, Гурванбулаг суманд болсон аймгийн бүсийн уралдаанд ахиад гурвалсан. Дараа нь Загийн ойд түрүүлээд, шигшмэл хурдад түрүүлээд , аймгийн наадамд зургаалсан. 
-2016 он гарсаар уралдсан юм уу?
-Баянбулаг суманд болсон хангайн бүсийн уралдаанд соёолон унаж гурваар давхисан. 
-Олон газар уралдаж байв уу?
-Гурванбулаг, Заг, Өлзийт, Бууцагаан, Галуут, Эрдэнэцогт, Баянбулаг гээд олон суманд очсоон. 
-Морь унахын хамгийн  сайхан нь вэ?
-Түрүүлж, айрагдах нь гоё. Бас газар үзэх нь гоё. 
-Хүндрэлтэй зүйл нь юу вэ. Санаа зоволтгүй хэлээрэй.
-Туугдаж явах л хэцүү. Морь хөөрөөд авч явчих гээд байдаг.
-Энхмөнх хэддүгээрийн ангийн сурагч вэ. Ямар дүнтэй сурдаг вэ?
-Өлзийт сумын дунд сургуулийн гуравдугаар ангид сурдаг. Хичээлдээ гайгүй ээ. 
-Минутанд хэдэн үг уншиж байна вэ?
-95, 96 үг уншдаг. Гэхдээ би унших бичихээс илүү биеийн тамир, дүрслэх урлагийн хичээлдээ дуртай. 
-Том болоод ямар мэргэжилтэй болъё гэж боддог вэ?
-Би уяач болно. Тэгэхийн тулд одоо морио сайн унах хэрэгтэй. Сайн унаач сайн уяач болдог гэж аав хэлсэн.
-Сайн унаач ямар байдаг юм бэ?
-Сэргэлэн, ухаантай,  морио сайн унадаг, зоригтой.
-Чамд тэр шинжүүд байна уу?
-Тал нь байгаа. Морь унахдаа сайн. Бас би гайгүй сэргэлэн, авхаалжтай./инээв/
-Тэгвэл сайн уяач болох нь. Чамд өөрийн гэсэн морь бий юу?
-Байгаа. Нэг байдас байгаа. Аав өгсөн юм. Тэр маань хар унага гаргасан.
-Улсдаа нэртэй мундаг уяач болоорой. Амжилт хүсье.
-Баярлалаа.

"Тод магнай" сэтгүүл. Баянхонгор аймгийн тусгай дугаар. 2016 он